„Rotkäppchen“

Neues vom Mundartkünstler Hans-Peter menzen

Et eß noch janet lang her, do wor ech ens bej Bekangde, die noch klendere Kenger hant. On do soch ech do em Bökerrejal e deck Märchebook stonn. Ech mech dat Book ens bekieke- wahllos opjeschlaare on hot dat Märchen von Rotkäppchen vor mech.

Ech denk, ech kick net richtich. Dat fing foljendermaßen an : er könnt dat jehr kontroleere. Also: „Originalzitat“ Es war einmal eine kleine süße Dirne, die hatte jedermann lieb. Ech denk:“ wat es dat?. Ech kick vüre op de Bookdeckel, äver dat wor richtich: Märchen der Gebrüder Grimm. Dodrop hin hann ech mech dat Märchen ens dorchjelese on wenn mer sech dat ens su richtich nöter on möt Verstank bekick dann froot mer sech,“ also, wat die Brüder Grimm sech do wohl bej jedeiht hannt, ech weeß et net“.

Do eß also von enem Mädche de Kall, wat en jrellich ruede Mötz anhot, die die Oma öm jestreck hot. Dat wor wahrscheinlich et inzije, wat die noch konnt: strecke on häkele. Ech nem aan, dat die och net mie richtich kicke konnt, sons höt die bestimmp net knallruet jenohme. Äver ejal, mot se wesse. On do dat Mädche von sing Motter no der erwähnde Oma jescheck wued, moß dat die Mötz natürlich och aan don. Ech meud wedde, dat wor dem äußerst peinlich dröm jing dat och meze durch der Bösch dat em kenne soech. En singem Körvke hot dat laut Brüder Grimm „ Kuchen und Wein“, ja wat eß dat dann von Kombination? Kook on Wing? Also en Friko on en Fläsch Beer, dat wüed ech jo verstonn.

Äver joot - on dann troof et enne Wolf. Ja, on de Wolf säht esu:“ „na, wo mäks due et dann hin en dem schöne Wäer?“ Übrijens, wo die Brüder Grimm sich net dröver uutjeloote hant, wie kallt mer eijentlich möt enne Wolf? En wat von Sproch? Wölfisch, oder wat? Jedenfalls hat de Wolf sech en dialektfreiem hochdeutsch erkundicht, wo et hin wollt. On wie de huet Jroßmutter hat de dann su nevebej jefroot, wo die wonnt on wat von Possleitzahl, vielleicht och noch de Handynr., on wat weeß ech noch all. Wie de Wolf nu alles woss, säht de dann: „maak et jot, ech hann noch ze donn“ on leep dann teils schnur teils straks no die Oma, die metze em Böösch, wie et do heesch „bei den 3 Eichen“ wonnde. Do hott die Oma wohl e Hüske jebout. Onger unges, do hött die nie em läeve en Baujenehmijung krieje.

De Wolf kütt do also aan, hä hot jo die jenaue Beschreibung von Rotkäppche- jeht erren, on friß die Oma op, also komplett. Do eß mech einijes onklor, z.B. wor die Dür einfach op? Hot die „Tag der offenen Tür“ oder wat? Dann eß mech och net janz klor, wie jing dat eijentlich? Dä Wolf hat also die Oma komplett opjefresse? Rein anatomisch krie ech dat net op de Reih. De Wolf es doch net vüll jrötter wie enne Schäferhonk, on do paaß en komplette Oma erren? Jot, et jüt jruete on kleene Omas. Oder wohre die Wölf damals jrötter als wie hük? Also dat hödde die Gebrüder Grimm och wesse könne. Äver ejal, on dann hatt de Wolf sech die Pluute von der Oma aahnjedonn, on sech en dat Bett von der jeleiht. Also wenn er mech froht, -janz schön bescheuert. Späder dann kohm dat Rotkäppche anjedaggelt, die Dür wor jo noch op, kütt erren on dann kohm jo dat Quizz wat mer jo esu kennt. Warum hass du so große Augen? Warum hast du so große Ohren? Et höt nur noch jefällt,dat dat jeseiht höt: Warum hass du so viele Haare auf der Brust? On dä Wolf hött dann saare modde: „dat ech dech enne Pullover strecke kann passend zo ding Kapp“.

Nodem de Wolf nu die Frorerej satt wor, hat de dat Rotkäppchen och noch jefresse. Mer mot sech vürstelle, die Oma wor jo och schon drenn. Jetz kohm dat Rotkäppche och noch dobej. Dat wor wohl enne Wolf XXL. No der janze fresserej nu wued de Wolf möd on hat sech en dat Bett jeleit on hat jeschnarch wat dat Zeuch hilt.

Nu koem rehn zofällich och noch enne Jäger vorbej on huet dat Jeschnarche. Hä jeht erren, die Dür wor jo noch op, on süht de Wolf em Bett lieje. Nu jeht de Jäger hin, schnick dem Wolf der Buch op, on wat soll ech öch saare, do kütt die Oma on dat Rotkäppche - o wunder lebendich ut dem Wolfsbuch erruut alle zwei- jot bem Rotkäpchen wor die Mötz e bißke verrutsch – äver sons alles enoder. Dan hand se e paar Stehn, ech nem an, Kalksanksteen, die noch övrich wore vom Bou, en de Buch vom Wolf jepack on dann zojetackert. On dat dollste eß, während der janze Zick hat de Wolf wiederjeschloope on nix jemerk. Wemm wolle die dann sujet verzelle? Wenn ech ehrlich senn soll, dat Märche hädden die Brüder Grimm äver doch noch ens överärbeje solle. Na ja, et hatt jo noch ens joot jejange on die Oma hat och versproche, wenn se wier honger hat, bruck dat Rotkäppchen net extra dorch der Bösch ze loope, sondern dann bestellt se sech jet bem Pizzataxi.

So, dat wor dat Märchen vom Rotkäppche. Äver die angere Märches send och net vüll besser. Wenn ech denk, z.B. Rapunzel- er weßt jo, wat die Hoore errongerjeloote hat, dat de Prinz do erropklömme konnt, also dat mot jo sujet von blond jeweeß sen, jedes angere Mädche höt jeseiht: „wat, ech komm erronger on maak dech de Dür op“.