Muschele op rheinische Art – April, April…

Ein Auszug der Ladies Neit von der Korschenbroicher Mundart-Lady Uschi Jansen.

Muschele schmecke et bäeß von September bös Aprel, en die Monde möt e „r“. Laater is to wärm, dann send se öm, wenn die von dat jruute Waater bös bee os send.
Minne Papp, dä maut Muschele fuerbar jern un dat woar emmer die enzije Kier, wo dä jekock hät. Dat wor e Schauspill: Enne Emmer Öelk wurd jeschällt un in Ringe jeschniee, völl Sellerie koam in de Suud, dat hat emmer herrlich jeduftet. Bee die Muschele jof et emmer Schwattbruet von Huppertz möt joe Botter drop.
Et wor der ieschte April 1970, ech wees et noch jenau, als wenn et jestern jewease wüer. Papp seht es morjens, ech mäut jern noch ens Muschele huet ovend eate, die Tiet wüer jo bald vorbee. He sätt vörr mech, ech sollde doch noh Klenebroek loope un en de Föschfabrik am Bahnhof fünef Ponk Muschele hoole.
Ech wor viellets stolz, ech wor jo noch e klee Mädche un dann son jruute Verantwortung! So bön ech vom spitze Hüske an de Engbrück loss jejange möt minne Korv, duer de Vaat be Busch, övver de Flöt in der Hannepark, an de Triet entlang, am Herrjottswinkel, wo fröher die Fischweher wore un dann emmer an de Bahn vorbee Richtung Klenebroek. Ech erinn en die Bud un han fünef Ponk Muschele bestellt. De Föschverkäufer hot jrad ene Blick op de Kalender jeworpe un frorde: „Keng, solle et Männekes or Wiffkes sinn?“
Ech wor ratlos un trock de Scholder: „Dat mot ech wiete, do muss de noch ens noh Huss un frore jonn. Dat kütt sech mit min Muschele janz jenau.“
Bedröppelt jing ech op Heem aan, der Wech wor wiet un et wor kalt, am Trietbrücksken is mech dann die Idee jekomme, half Männekes un half Wiffkes ze neahme, do koss ech doch nix möt falsch maake. Also wier erömm un in die Föschfabrik. „Ech moit halv Männekes un halv Wiffkes koope!“ De Mann set: „Joot, da mösse ävver mer fein oppasse. Reits in de Korv donn ech dech die Männekes, on lenks die Wiffkes un ech lech noch en aale Zitung do tösche, dat se net dureneen komme. Dat es eso: Die Männekes send aromatischer, die Wiffkes jet zarter. „ De Kearl moss sech kapott jelach han, als ech wier noh Huss jing.
Ävver ech wor so stolz, dat ech dat schwierige Jeschäff so jot erledigt hott un bön noh Huss jespronge un jehöpp vörr lauter Freud.
Ze Heem han ech dem Papp dat dann jenau erkliert, möt die Männekes un die Wiffkes, ech hot dat alles jot behalde. De Papp wor ene Schelm un hat direkt bejriepe, dat ech en der April jeschick worde bön un hat dat Spillke mötjemäk.
Normalerwies sähst de dan jo ens irjendwann „April, April“ un klärst die Jeschicht op. Ech weet net, op et Absicht or uut Versehe wor, mech hantse en dem Jlöv jeloote.
Ech wor 17 Johr alt un bön möt minne ieschte Frünk, et Hännske noh Ödinger jejange um Muschele ze eate.
Beckisch Helja koam an der Dösch un frochte, wat mer wollde un merr bestellte zwee Hannen Alt, dat jov et damols noch bee Ödinger, un zweemol Muschele Rheinische Art. Bald koame och schon die schwatte Pött möt die Muschele an der Dösch. Jetz wollde ech vürr Hänske ävver ens möt mie Fachwisse optrumpfen un han jefrocht: „ Frau Beckers, sind dat Männekes or Wiffkes en de Pott ? Dat es wichtig ze wiete! Un lieje die reits oder lenks in de Pott? „ Beckisch Helja kiekte e biske verwirrt un jing en de Küek.
Se koam wier un minnde: „De Kook hät jeseit, et send halv Männekes un halv Wiffkes.“ Ech sait: „Juut, wisst err, dat is nämlich eso: Die Männekes send aromatischer, die Wiffkes völl zarter!“ Se schöttelte blos der Kopp un jing. Hänsken, de am Anfang noch jejlöv hot, ech maak e Späske, hat mech dann vertellt, wat dat füer ene Quatsch wor. Selde woar mech jet so peinlich un ech bön bee Ödinger nie mie Muschele eate jejange. Un ech meen bes huet kiecke die mech e biske bescheiden aan, wenn ech do erinn kumm. Möt Hänsken hot sech dat kuut drop och erledicht.
Wenn ech et jetz jeschaff han, dat err demnächst de Männekes un de Wiffkes beem Muscheleeaten söcke deit, dann denkt dran: Die Männkes reits send jröter un aromatischer, die Wiffkes lenks jet kleener un völl zarter. Völl Spass un jooe Appetit!